Assistert befruktning til einslege blei lovleg frå 1. juli 2020.
I samband med evalueringa av bioteknologiloven i 2024 og 2025 henta direktoratet inn data om kor mange einslege som har fått behandling etter lovendringa, kor mange barn som er fødde av einslege mødrer, og aldersfordelinga på dei einslege som har fått behandling. Oversiktane som blir presentert her er tidlegare offentleggjort i rapportane om evalueringa av bioteknologiloven. Data om fødslar og barn inngår også i talmaterialet som vi viser i avsnittet om assistert befruktning med donor.
Data som blei samla inn viser at det er mange fleire einslege som får behandling ved private verksemder enn ved offentlege. Figuren viser kor mange einslege som har fått behandling med donorsæd frå 1. juli 2020 og kvart år fram til og med 31. desember 2024, fordelt på offentlege (lilla kurve) og private (mørkegrøn kurve i midten) verksemder. Det samanlagte talet på einslege som har fått behandling kvart år (turkis kurve øvst) har auka gjennom heile perioden.
Data frå både private og offentlege klinikkar viser at det er flest einslege kvinner i aldersgruppa 35 til 39 år som har fått behandling med assistert befruktning. Dei fleste behandlingane til einslege kvinner skjer ved private klinikkar.
Forskjellen i talet på behandlingar av einslege kvinner ved offentlege og private verksemder er spesielt stor for aldersgruppa over 40 år; til saman 56 kvinner ved offentleg verksemd og til saman 797 ved privat. I gruppa 35 til 39 år er forskjellen litt mindre; der er det til saman 263 einslege som har fått behandling ved offentleg verksemd og til saman 881 ved privat. Ein av grunnane kan vere at kvinner som er 40 år eller eldre sjeldan blir prioritert i den offentlege helsetenesta fordi ein forventar at nytta av behandlinga er lågare.
Figuren viser aldersfordelinga for einslege kvinner som har fått behandling med donorsæd frå 1. juli 2020 og fram til og med 31. desember 2024, fordelt på offentlege (mørkegrøne søyler) og private (lilla søyler) verksemder. Data gjeld behandlingar utført ved norske verksemder.
Talet på barn født etter assistert befruktning til einslege kvinner (lilla kurve i figuren) har auka gjennom heile perioden. Ifølgje data som Helsedirektoratet har samla inn er det til saman 566 barn som er fødde av einslege kvinner etter behandling donorsæd i den aktuelle perioden.
Det er fleire einslege kvinner som får behandling ved private verksemder enn ved offentlege, og difor er talet på barn født etter slik behandling høgare hos dei private verksemdene (mørkegrøn kurve i figuren), som forventa. Den turkise kurva øvst viser samanlagt tal på kor barn til som blei fødde etter assistert befruktning det aktuelle året.
Tal på barn (y-aksen) er registrert på det året behandlinga blei utført. Barna kan vere fødde same året eller året etter.