Fordeling av offentlege og private klinikkar og bruk av metodar er også omtalt i rapporten om evaluering av bioteknologiloven får 2025 Status for godkjente virksomheter og behandlingsformer, med nokre oppdateringar her.
Alle er godkjende for å tilby dei vanlegaste formane for IVF (standard in vitro fertilisering og ICSI – intracytoplasmatisk spermieinjeksjon) og inseminasjon. Per mai 2026 har fire av dei offentlege sjukehusa (OUS, Sjukehuset Telemark HF, St. Olavs hospital og UNN) tilbod om behandling med donorsæd, og to av dei (OUS og St. Olavs hospital) rekrutterer eigne donorar. Sykehuset Telemark HF og UNN importerer sæd frå sædbankar i Danmark.
Det er to offentlege sjukehus som er godkjende for assistert befruktning med donoregg: OUS og St. Olavs hospital. Begge verksemdene rekrutterer eigne eggdonorar.
Talet på private verksemder har auka i perioden. I 2007 var det fire private klinikkar, medan det per mai 2026 er sju private verksemder som tilbyr assistert befruktning. Dei fleste klinikkane er lokalisert til større byar. Det er ikkje privat tilbod nord for Trondheim. Fleire av dei sju verksemdene har klinikkar på ulike stader i landet, noko som gir eit samla privat tilbod fordelt på 14 klinikkar: Aleris Frogner, Artemis gynekologi (berre inseminasjon), C-Medical (tidlegare C-Medical og Livio IVF), Klinikk Hausken (Bergen, Haugesund, Stavanger og Oslo), Medicus (Bergen, Stavanger, Oslo og Trondheim), Vitoklinikken AS og Volvat Spiren (Oslo - tidlegare Fertilitetssenteret og Trondheim).
Seks av dei sju private verksemdene har tilbod om både behandling med inseminasjon og dei vanlegaste formane for IVF ved alle klinikkane. Per mai 2026 har alle utanom Artemis tilbod om behandling med donorsæd og Aleris Frogner, C-Medial, Klinikk Hausken, Medicus og Volvat Spiren Trondheim har tilbod om behandling med donoregg.
Rapportane som blir sendt til Helsedirektoratet inneheld data om bruk av metodar. Det blir rapportert om desse metodane:
- inseminasjon (IUI) med bruk av partnarsæd eller donorsæd
- IVF/ICSI: Befruktning utanfor kroppen der egg og sæd blir blanda saman i laboratorieskål (IVF) eller der ein injiserer ei enkelt sædcelle i kvart egg (ICSI). Begge metodar kan være aktuelle både ved bruk av partnarsæd og donorsæd, og i nokre tilfelle bruker ein ICSI ved befruktning av donoregg. Her inngår også tal om bruk av sæd frå testikkel eller bitestikkel som er henta ut ved kirurgisk teknikk i kombinasjon med ICSI.
- innsetting av embryo som er laga ved hjelp av IVF/ICSI og som har vore fryst (Frozen Embryo Transfer, FET): Aktuell ved bruk av partnarsæd, donorsæd eller donoregg, og ved partnardonasjon av egg (ROPA). Dei aller fleste behandlingane med eggdonasjon blir registrert som FET fordi det er vanleg at egget blir lagra fryst før det blir befrukta, eller at egget blir befrukta med sæd frå kvinna sin ektefelle eller sambuar, og så lagra fryst før det blir brukt.
Mange av dei private klinikkane rekrutterer eigne egg- eller sæddonorar. Medicus, Hausken og Volvat Spiren (Trondheim) rekrutterer både egg - og sæddonorar. Dei som ikkje rekrutterer eigne donorar, importerer donoregg og/eller donorsæd frå ein egg-eller sædbank i eit anna Nordisk land; som regel frå Danmark (sæd) eller Finland (egg).
Kurvene i figuren viser at talet på offentlege klinikkar ikkje har endra seg i perioden 2007 – 2026 medan talet på private klinikkar har auka.
Figuren over viser utviklinga. Y-aksen viser talet på klinikkar. I 2024 blei ein privat klinikk nedlagt (ein av fleire under same verksemd). Ei ny verksemd fekk godkjenning i 2025 (VitoKlinikken). Frå desember 2025 blei Livio IVF ein del av C-medical.
Kartet viser kor klinikkane er lokalisert. Dei blågrøne felta markerer lokaliseringa til dei offentlege verksemdene, lilla markerer private. Storleiken på sirklane indikerer om det er fleire klinikkar på same stad. Det finns offentlege klinikkar i alle helseregionane, men det er ingen private klinikkar nord for Trondheim.