I perioden 2007 til og med 2023 har Helsedirektoratet motteke rapportar om til saman 40434 fødslar etter assistert befruktning. Då er alle fødslar etter IVF og inseminasjonsbehandling inkludert, også fødslar der det er brukt donoregg eller donorsæd.
Figuren nedafor viser det samanlagte (kumulative) talet på fødslar i kvar aldersgruppe i perioden. Det er rapportert flest fødslar i aldersgruppa 30 til 34 år og færrast i aldersgruppa 40 år eller eldre (> 40 år).
X-aksen viser aldersgruppene og y-aksen viser det samanlagte talet på fødslar etter assistert befruktning i kvar aldersgruppe og totalt. < 29 år er gruppa som er 29 år eller yngre. > 40 år er aldersgruppa som er 40 år eller eldre.
Tal på fødslar i kvar aldersgruppe har variert noko over tid. Dette er illustrert i figuren nedanfor.
Figuren viser prosentdel av fødslar i kvar aldersgruppe og variasjon over tid. Figuren viser at aldersgruppa 30 til 34 år (lilla kurve øvst) har stått for den høgaste prosentdelen av fødslar etter assistert befruktning gjennom heile perioden. Vi ser ei markant auking i prosentdelen av fødslar i aldersgruppa over 40 år (den gule kurva nedst), særleg etter 2019. Det er også ein nedgang i prosentdelen av fødslar i aldersgruppa som er 29 år eller yngre (mørk grøn kurve).
Data frå Medisinsk fødselsregister for denne perioden viser at gjennomsnittsalder for når kvinner får første barnet har auka med 2,2 år, frå 27,6 år i 2007 til 29,8 år i 2023. Alder på kvinner som føder første barnet etter assistert befruktning auka med 1,4 år i den same perioden. Denne gruppa av førstegongsfødande hadde gjennomsnittsalder 33,8 år i 2023. Generelt er kvinner som får første barnet etter assistert befruktning frå 3,6 til 4,9 år eldre enn kvinner som føder første barn etter svangerskap utan assistert befruktning.
Gjennomsnittsalderen på kvinner som får barn nummer to, tre eller fire (fleirgangsfødande) har også auka gjennom perioden, men skilnaden mellom dei som ble gravide utan og med hjelp av assistert befruktning er mindre i denne gruppa fødande. Her ligg aldersskilnaden mellom 2,6 og 3,1 år i åra 2007 til og med 2023. Gjennomsnittsalder på fleirgangsfødande som fekk sitt siste barn etter assistert befruktning var 35,4 år i 2023. Tilsvarande tal var 32,5 år for fleirgangsfødande som fekk siste barnet utan assistert befruktning.
Figuren nedanfor viser utviklinga over tid, og illustrerer kor stor del av fødslane det aktuelle året som var ein fødsel etter behandling med assistert befruktning, fordelt på aldersgrupper. Fødslar etter assistert befrukting hos kvinner som er 29 år eller yngre utgjer frå rundt 1 prosent av alle fødslar dei første åra til rundt 2 prosent dei seinaste åra, og har heile tida vore lågare enn prosentdel fødslar etter assistert befruktning i dei andre aldersgruppene. Prosentdelen med assistert befruktning av alle fødslar i aldersgruppa 35 til 39 år har auka jamt gjennom perioden, med ei markant stigning frå 2021 (8,1 prosent) til 2023 (10,1 prosent). Denne aldersgruppa har heile tida hatt ein større prosentdel av fødslar etter assistert befruktning enn gjennomsnittet.
Prosentdelen av fødslar etter assistert befruktning i aldersgruppa som er 40 år eller eldre har også auka gjennom heile perioden, og auka med meir enn 45 prosent mellom 2021 og 2023 (frå 9.4 prosent til 16 prosent). Prosentdel av fødslar i aldersgruppa 30 til 34 år har vore ganske lik gjennom heile perioden, og ligg nær gjennomsnittet.
Den lys grøne linja viser kor stor del av alle fødslane kvart år som var ein fødsel etter assistert befruktning. Den gule kurva med trekantmarkør viser kor stor prosentdel av fødslane i aldersgruppa over 40 år som var ein fødsel etter assistert befruktning. Den turkise kurva med firkantmarkør viser prosentdelen for aldersgruppa 35 til 39 år, og den lilla linja med diamantmarkør viser prosentdelen for aldersgruppa 30 til 34 år. Den mørkegrøne kurva nedst viser aldersgruppa som er 29 år eller yngre.
Viss vi ser på fordelinga av fødslar per aldersgruppe hos dei offentlege og private klinikkane, er det også forskjellar, noko som er illustrert i figurane nedanfor. Data om fødslar er registrert på det året som behandlinga blei utført.
Offentlege klinikkar har rapportert flest fødslar i aldersgruppa 30 til 34 år gjennom heile perioden. Dei private klinikkane har heile tida har hatt fleire fødslar i aldersgruppa 40 år og eldre, eit teikn på at dei også gir behandling til fleire kvinner i denne aldersgruppa enn det dei offentlege klinikkane gjer.
Figuren viser forskjellar variasjon over tid for aldersgruppa som er 29 år eller yngre. Y-aksen er talet på fødslar. Den øvste kurva viser fødslar etter behandling ved offentlege klinikkar dei aktuelle åra, og den nedste viser fødslar etter behandling ved private klinikkar.
Figuren viser forskjellar variasjon over tid for aldersgruppa som er mellom 30 til 34 år. Y-aksen er talet på fødslar. Den øvste kurva viser fødslar etter behandling ved offentlege klinikkar dei aktuelle åra, og den nedste viser fødslar etter behandling ved private klinikkar.
Figuren viser forskjellar variasjon over tid for aldersgruppa som er mellom 35 til 39 år. Y-aksen er talet på fødslar. Den øvste kurva viser fødslar etter behandling ved offentlege klinikkar dei aktuelle åra, og den nedste viser fødslar etter behandling ved private klinikkar.
Figuren viser forskjellar variasjon over tid for aldersgruppa som er 40 år eller eldre. Y-aksen er talet på fødslar. Den øvste kurva viser fødslar etter behandling ved offentlege klinikkar dei aktuelle åra, og den nedste viser fødslar etter behandling ved private klinikkar.