Dei fleste som bruker tobakksprodukt eller vape bruker berre eitt produkt, men i 2025 var det likevel ein stor andel som rapporterte å bruke ulike kombinasjonar av fleire tobakks- og nikotinprodukt. Det var 26 % av kvinnene og 36 % av mennene (16–79 år) som rapporterte at dei brukte minst eit tobakks- eller nikotinprodukt dagleg eller av og til, dvs. at dei brukte eit, to eller tre produkt i kombinasjon. I aldersgruppa 16 til 24 år var andelane høgare, og om lag 41 % av både kvinner og menn brukte minst eit produkt dagleg eller av og til (ikkje vist i figur).
Den vanlegaste kombinasjonen av bruk av to produkt, var bruk av snus og sigarettar for både kvinner og menn, men for kvinner var bruk av vape og sigarettar nesten like vanleg medan kombinasjonen vape og snus var den minst vanlege. Blant kvinner i alderen 16 til 79 år som rapporterte å bruke minst eit tobakksprodukt og/eller vape, rapporterte vel 12 % at dei brukte snus og sigarettar. Tilsvarande tal for menn var omlag 20 %. Det var mindre vanleg å bruke alle tre produkta, og om lag 4 % av både kvinner og menn rapporterte at dei brukte alle tre produkta i kombinasjon, sjå figur nedanfor.
Å bruke to produkt i kombinasjon varierte med alder. Bruk av både snus og sigarettar og bruk av snus og vape var vanlegast blant dei mellom 16 og 24 år og mindre vanleg med aukande alder, medan kombinasjonen vape og sigarettar var vanlegast blant dei mellom 55 og 79 år, sjå figuren nedanfor.
Bruken av alle tre produkta var vanlegast i aldersgruppa 16 til 24 år med 9,9 % og nest vanlegast blant dei som var 25 til 54 år med 3,2 %. Blant dei eldste var det berre 0,5 % som brukte alle tre produkta (tala er ikkje vist i figur).