Andelen som bruker snus dagleg har auka sidan 2012 i alle aldersgrupper. Fleire menn enn kvinner bruker snus dagleg, og bruken er hyppigare blant dei under 45 år. Dagleg bruk av snus har sidan 2012 lege stabilt på rundt 15 % for kvinner og 25 % for menn i aldersgruppa 16 til 24 år, medan det har vore ein aukande trend i aldersgruppene 25 til 64 år, særleg blant menn.
Andelen som oppgir å bruke snus av og til har halde seg meir stabil dei siste 12 åra, og her er det mindre forskjellar mellom kjønna enn hos dei som bruker snus dagleg.
Medan røyking har gått ned i befolkninga dei siste tiåra, har bruken av snus auka (FHI, 2024). I 2024 oppgav vel 20 % av menn at dei brukte snus dagleg, medan i underkant av 6 % oppgav at dei brukte snus av og til. Blant kvinner var andelen som brukte snus dagleg nesten 10 %, medan 4,4 % brukte snus av og til.
Bruk av snus er mest utbreidd i aldersgruppa 25 til 34 år. I 2024 oppgav nesten 29 % i denne aldersgruppa å bruke snus dagleg, og 8 % oppgav å bruke snus av og til. I den yngste aldersgruppa (15–24 år) oppgav omtrent 21 % dagleg bruk og 9 % av-og-til-bruk av snus.