Ifølge Normen, helsesektoren si eiga bransjenorm for informasjonssikkerheit og personvern, er interessa for tydelege råd og rettleiing om tale-til-utkast stor i sektoren.
Råda er oppsummerte i eit faktaark, og kan lesast her: Trygg bruk av KI i dokumentasjon av helsehjelp (tale-til-utkast).
Effektiv dokumentasjon
Tale-til-utkast, som omfattar verktøy for tale-til-tekst, tale-til-notat eller tale-til-samandrag, kan spare tid og bidra til meir effektiv dokumentasjon i ein travel kvardag. Samstundes kan KI-genererte utkast innehalde feil, manglar eller misforståingar.
– Helsetenesta har teke i bruk kunstig intelligens på imponerande vis. KI gir store moglegheiter, mellom anna til å effektivisere dokumentasjonsarbeidet, men stiller òg tydelege krav til medviten bruk og kontroll. Helsepersonell har ansvar for innhaldet i journalen, og må sikre at KI-generert tekst er korrekt før han blir lagra, seier helsedirektør Cathrine M. Lofthus.
Støtte til trygg og forsvarleg bruk
Faktaarket gir mellom anna råd om personvern, informasjonssikkerheit, ansvar og kvalitetssikring. Spørsmål om lovlegheit, val av verktøy og ansvar ved bruk av KI blir òg tekne opp.
Målet er å leggje til rette for at ny teknologi kan takast i bruk utan at det går på kostnad av pasienttryggleik, personvern eller kvalitet.
– Føremålet er ikkje å bremse utviklinga, men å støtte sektoren i å bruke KI på ein trygg og ansvarleg måte. Vi ser ein etterspurnad og eit engasjement for informasjon som vi ikkje har sett tidlegare, seier leiar av sekretariatet i Normen, Geir-Erlend Johansen. Sekretariatet for Normen ligg i Helsedirektoratet.