Reglane som gjeld i dag gir fritak frå eigendeler for barn under 16 år. Frå 1. august 2026 blir aldersfritaket endra til 18 år. Dette betyr at 16- og 17-åringar slepp å betale eigendel når dei går til lege eller nyttar andre tenester under frikortordninga.
Desse helsetenestene er omfatta av fritaket:
- behandling hos fastlege, legevakt og avtalespesialist
- behandling hos fysioterapeut med driftsavtale med, eller tilsetting i, kommunen
- legemiddel, næringsmiddel og forbruksmateriell på blå resept
- pasientreiser
- poliklinisk helsehjelp i spesialisthelsetenesta
- private laboratorium og røntgeninstitutt som har avtale med regionale helseføretak
- private rehabiliteringsinstitusjonar som har avtale med regionale helseføretak
Tenester som ikkje blir påverka:
Tenester som allereie har fritak til 18 år eller høgare blir ikkje påverka av endringa. Dette gjeld mellom anna:
- behandling hos psykolog
- tannlege og tannpleiar
- behandlingsreiser til utlandet
Innan psykisk helsevern og tverrfagleg spesialisert rusbehandling gjeld fritak for eigendel ut det kalenderåret pasienten fyller 26 år.