- Go sámegielat dearvvašvuođabargit ožžot rávvagiid ja dieđu sámegillii, de lea álkit addit dieđuid pasieanttaide, geavaheddjiide, oapmahaččaide ja sin ovddasteddjiide. Dieinna lágiin rávvagat davvisámegillii váikkuhit dássásašvuođa sidjiide geain lea sámegiella vuosttašgiellan, cealká Dearvvašvuođadirektoráhta divišuvdnadirektevra Helen Brandstorp.
Rávvagat leat ráhkaduvvon jođiheddjiid várás ja sin várás geat barget pasieanttaiguin gárrenmirko- ja psyhkalaš dearvvašvuođasuorggis, sihke suohkandearvvašvuođabálvalusas ja spesialistadearvvašvuođabálvalusas. Ja leat ráhkaduvvon maid politihkkáriid ja hálddahuslaš jođiheami várás suohkaniin. Ulbmilin lea nannet geavaheaddji- ja oapmahašváikkuheami – sihke oktagasa, bálvalusa ja systema dásis.
Rávvagat almmuhuvvojedje dárogillii diibmá. Dál lea davviságel veršuvdna gárvvis.
Čuovvola Sámedikki sávaldaga
Go Dearvvasvuođadirektoráhtta ráhkadii rávvagiid geavaheddjiid- ja oapmahaš-mielváikkuheapmái gárrenmirko- ja psyhkalaš dearvvašvuođasuorggis diibmá, de lei vuosttaš geardde ahte ráhkaduvvojedje našuvnnalaš fágalaš rávvagat geavaheddjiid- ja oapmahašmielváikkuheapmái.
Go dárogielveršuvdna lei gulaskuddamis, de oaččui Dearvvasvuođadirektoráhtta čielga máhcaheami Sámedikkis ahte berre ráhkaduvvot davvisámegiel veršuvdna. Dát veršuvdna mii dál lea gárvvis, lea čielga čuovvoleapmi dien máhcaheamis.
Konkrehta rávvagat ieš guđet dásiide
Rávvagat leat juhkkojuvvon dásiid mielde dearvvašvuođa suorggis, ja addet konkrehta evttohusaid movt berre systemáhtalaččat organiseret geavaheddjiid- ja oapmahaš-mielváikkuheami.
- Okta dain deháleamos áššiin lea oažžut jođiheddjiid váldit rávvagiid adnui. Jođiheaddjit váikkuhit guottuide ja doaimmahaga kultuvrii ja leat eaktun ahte geavaheddjiid- ja oapmahaš-mielváikkuheapmi lea laktojuvvon ja ahte leat systemáhtalaš oassin ovdánahttin ja buoridan proseassain, cealká Helen Brandstorp.